חומש

רש"י

פרק א (א) וַיְדַבֵּר יְ־הֹוָ־ה אֶל מֹשֶׁה בְּמִדְבַּר סִינַי בְּאֹהֶל מוֹעֵד בְּאֶחָד לַחֹדֶשׁ הַשֵּׁנִי בַּשָּׁנָה הַשֵּׁנִית לְצֵאתָם מֵאֶרֶץ מִצְרַיִם לֵאמֹר:

(א) וידבר. במדבר סיני באחד לחדש - וגו' מתוך חיבתן לפניו מונה אותם כל שעה, כשיצאו ממצרים מנאן, וכשנפלו בעגל מנאן לידע מנין הנותרים. כשבא להשרות שכינתו עליהן מנאן. באחד בניסן הוקם המשכן, ובאחד באייר מנאם:

(ב) שְׂאוּ אֶת רֹאשׁ כָּל עֲדַת בְּנֵי יִשְׂרָאֵל לְמִשְׁפְּחֹתָם לְבֵית אֲבֹתָם בְּמִסְפַּר שֵׁמוֹת כָּל זָכָר לְגֻלְגְּלֹתָם:

(ב) למשפחתם - דע מנין כל שבט ושבט: לבית אבתם - מי שאביו משבט אחד ואמו משבט אחר יקום על שבט אביו: לגלגלתם - על ידי שקלים בקע לגלגולת:

(ג) מִבֶּן עֶשְׂרִים שָׁנָה וָמַעְלָה כָּל יֹצֵא צָבָא בְּיִשְׂרָאֵל תִּפְקְדוּ אֹתָם לְצִבְאֹתָם אַתָּה וְאַהֲרֹן:

(ג) כל יצא צבא - מגיד שאין יוצא בצבא פחות מבן עשרים:

(ד) וְאִתְּכֶם יִהְיוּ אִישׁ אִישׁ לַמַּטֶּה אִישׁ רֹאשׁ לְבֵית אֲבֹתָיו הוּא:

(ד) ואתכם יהיו - כשתפקדו אותם יהיו עמכם נשיא כל שבט ושבט:

(ה) וְאֵלֶּה שְׁמוֹת הָאֲנָשִׁים אֲשֶׁר יַעַמְדוּ אִתְּכֶם לִרְאוּבֵן אֱלִיצוּר בֶּן שְׁדֵיאוּר:

(ו) לְשִׁמְעוֹן שְׁלֻמִיאֵל בֶּן צוּרִישַׁדָּי:

(ז) לִיהוּדָה נַחְשׁוֹן בֶּן עַמִּינָדָב:

(ח) לְיִשָּׂשכָר נְתַנְאֵל בֶּן צוּעָר:

(ט) לִזְבוּלֻן אֱלִיאָב בֶּן חֵלֹן:

(י) לִבְנֵי יוֹסֵף לְאֶפְרַיִם אֱלִישָׁמָע בֶּן עַמִּיהוּד לִמְנַשֶּׁה גַּמְלִיאֵל בֶּן פְּדָהצוּר:

(יא) לְבִנְיָמִן אֲבִידָן בֶּן גִּדְעֹנִי:

(יב) לְדָן אֲחִיעֶזֶר בֶּן עַמִּישַׁדָּי:

(יג) לְאָשֵׁר פַּגְעִיאֵל בֶּן עָכְרָן:

(יד) לְגָד אֶלְיָסָף בֶּן דְּעוּאֵל:

(טו) לְנַפְתָּלִי אֲחִירַע בֶּן עֵינָן:

(טז) אֵלֶּה [קריאי] קְרוּאֵי הָעֵדָה נְשִׂיאֵי מַטּוֹת אֲבוֹתָם רָאשֵׁי אַלְפֵי יִשְׂרָאֵל הֵם:

(טז) אלה קרואי העדה - הנקראים לכל דבר חשיבות שבעדה:

(יז) וַיִּקַּח מֹשֶׁה וְאַהֲרֹן אֵת הָאֲנָשִׁים הָאֵלֶּה אֲשֶׁר נִקְּבוּ בְּשֵׁמוֹת:

(יז) האנשים האלה - את שנים עשר נשיאים הללו: אשר נקבו - לו כאן בשמות:

(יח) וְאֵת כָּל הָעֵדָה הִקְהִילוּ בְּאֶחָד לַחֹדֶשׁ הַשֵּׁנִי וַיִּתְיַלְדוּ עַל מִשְׁפְּחֹתָם לְבֵית אֲבֹתָם בְּמִסְפַּר שֵׁמוֹת מִבֶּן עֶשְׂרִים שָׁנָה וָמַעְלָה לְגֻלְגְּלֹתָם:

(יח) ויתילדו על משפחתם - הביאו ספרי יחוסיהם ועידי חזקת (לידתם) [לידת] כל אחד ואחד, להתייחס על השבט:

(יט) כַּאֲשֶׁר צִוָּה יְ־הֹוָ־ה אֶת מֹשֶׁה וַיִּפְקְדֵם בְּמִדְבַּר סִינָי: